ߓߋ߬ߒ߬ߞߊ߲߬ߠߌ߲ ߣߌ߲߬ ߞߍ߫ ߘߊ߫ ߓߊߣߌߓߊ߲ߜ߭ߎ ߘߎ߱ ߟߋ߬ ߟߊ߫߸ ߕߌߟߊߓߋߙߌ߫ ߡߊ߬ߙߊ ߘߐ߫، ߖߋ߬ߟߌ߬ߓߊ߬ߘߎ߯ ߟߊ߬ߞߊ߲߬ߘߊ߬ߟߌ ߞߏߕߌ߮ ߟߋ߬ ߞߊ߬ ߟߊ߬ߥߊ߲߬ߞߊ߲߬ߠߌ߲ ߣߌ߲߬ ߞߍ߫ ߝߘߏ߬ߓߊ߬ ߥߎߦߊ߲ߓߍ߲ ߠߊ߫߸ ߛߙߋ ߘߏ߫ ߟߊ߫ ߝߐߟߌ߫ ߘߐ߫߸ ߓߊ߰ߓߊ߰ߟߌ߬ ߞߍ߬ߟߊ ߡߍ߲߬ ߠߎ߫ ߣߊ߬ ߘߊ߫ ߓߏ߬ߙߌ߬ߝߋ߲ ߠߎ߬ ߟߋ߬ ߞߊ߲߬، ߜߋ߲ߜߋ߲ߦߊ߫ ߓߟߏߡߊ߬ ߞߐ߲߬ߛߏ߫ ߟߏ߯ߟߎ߫ ߊ߬ ߣߌ߫ ߔߏߔߏ߫ ߗߍ߬ߡߍ߫ ߝߌ߬ߟߊ߬ ߣߌ߫ ߞߐ߫، ߞߏߕߌ߮ ߟߊ߫ ߝߐߟߌ߫ ߘߐ߫߸ ߓߊ߰ߓߊ߰ߟߌ߬ߟߊ ߡߍ߲߬ ߠߎ߫ ߓߙߍ߬ߦߊ ߕߘߍ߬ ߘߌ߫ ߥߊ߫ ߤߊ߲߯ ߡߐ߰ ߗߡߍ߬ ߦߙߌߞߊ߫ ߢߐ߲߰؛ ߞߏ߫ ߊ߬ߟߎ߫ ߞߊ߬ ߣߊ߲߬ߕߌ߰ ߃߄ ߟߋ߬ ߓߣߐ߬ ߊ߬ߟߎ߬ ߣߌ ߘߐ߫߸ ߞߊ߬ ߁߄ ߖߐߞߌ߫، ߊ߬ ߟߊ߫ ߞߎߡߊ߫ ߘߐ߫߸ ߖߐߞߟߌߓߊ߯ߕߐ ߟߎ߬ ߞߏ߬ߣߌ߲ ߦߋ߫ ߘߊ߲ߘߊߟߌ ߘߊߞߘߐ߫.
ߖߋ߬ߟߌ߬ߓߊ߬ߘߎ߯ ߞߟߍ߬ߓߟߏ ߞߏߕߌ߮ ߛߊߟߌߝߎ߬ ߡߏߘߌ߫ ߞߵߊ߬ ߟߴߊ߬ ߞߊ߲߬߸ ߞߏ߫ ߣߊ߲߬ߕߌ߮ ߟߎ߬ ߛߋ߫ ߘߊ߫ ߓߊ߰ߓߊ߰ߟߌ߬ߟߊ ߁߀ ߣߌ߫ ߞߐ߫ ߢߐ߲߰ ߝߊ߰ ߟߊ߫، ߕߐ߲߫ ߓߟߏߡߊ ߘߏ߫ ߟߎ߫ ߟߊߕߊ߯ ߘߊ߫ ߓߋ߬ߒ߬ߞߊ߲߬ߠߌ߲ ߘߊߞߎ߲ ߣߌ߲߬ ߘߐ߫߸ ߘߏ߫ ߟߎ߫ ߦߋ߫ ߘߎ߱ ߡߊ߬߸ ߘߏ߫ ߟߎ߫ ߦߋ߫ ߛߊ߲ߡߊߞߎߟߎ߲ ߞߣߐ߫ ߛߊ߲ߡߊ߬، ߏ߬ ߓߍ߯ ߦߋ߫ ߓߊ߰ߓߊ߰ߟߌ߬ߟߊ ߡߍ߲߬ ߠߎ߫ ߟߋ߬ ߢߌߣߌ߲߫ ߞߊ߲߬߸ ߓߊߣߌߓߊ߲ߜ߭ߎ ߘߎ߱ ߣߌ߲߬ ߦߋ߫ ߖߋ߬ߟߌ߬ߓߊ߬ߘߎ߯ ߕߟߋ߬ߓߋ ߟߋ߬ ߘߐ߫߸ ߕߌߟߊߓߋߙߌ߫ ߡߊ߬ߙߊ ߘߐ߫، ߦߙߐ ߣߌ߲߬ ߦߋ߫ ߖߡߊ߬ߣߊ ߝߌ߬ߟߊ ߓߐߕߏ߲ ߠߋ߬ ߟߊ߫߸ ߣߴߏ߬ ߦߋ߫ ߡߊ߬ߟߌ ߣߌ߫ ߓߙߎߞߌߣߊ߫ ߖߡߊ߬ߣߊ ߘߌ߫؛ ߦߙߐ ߞߋߟߋ߲ ߏ߬ ߦߋ߫ ߊߟߑߞߊߦߘߊ߫ ߣߌ߫ ߖߘߍ߬ߞߟߏ߬ߦߊ߬ ߖߡߊߣߊ ߓߊ߰ߓߊ߰ߟߌ߬ ߞߙߎ ߟߎ߬ ߡߊߞߍ߫ ߦߙߐ ߟߋ߬ ߘߌ߫؛ ߞߊ߬ߓߌ߯ ߘߓߊ߬ߕߊ ߕߊ߬ߡߌ߬ߣߍ߲ ߠߊ߫߸ ߖߘߍ߬ߞߟߏ߬ߦߊ߬ ߖߡߊߣߊ ߓߊ߰ߓߊ߰ߟߌ߬ ߞߙߎ ߞߊ߬ ߓߋ߬ߒ߬ߞߊ߲߬ߠߌ߲ ߘߏ߫ ߕߌ߰ߦߊ ߕߊ߬߸ ߏ߬ ߞߍ߫ ߘߊ߫ ߋߞߑߣߋߥߊ߲߫ ߘߎ߱ ߟߋ߬ ߟߊ߫، ߖߋ߬ߟߌ߬ߓߊ߬ߘߎ߯ ߣߌ߫ ߡߊ߬ߟߌ ߓߐߕߏ߲ ߠߊ߫؛ ߣߊ߲߬ߕߌ߰ ߛߌߦߊߡߊ߲߫ ߠߋ߬ ߣߌ ߕߏ߫ ߘߊ߫ ߏ߬ ߝߣߊ߫ ߘߐ߫.
