ߖߋ߬ߟߌ߬ߓߊ߬ߟߊ߫: ߡߐ߰ ߁߅߀ ߓߘߊ߫ ߕߏ߫ ߖߌߓߐ ߘߏ߫ ߘߐ߫ ߖߡߊ߬ߣߊ ߕߊ߲ߓߊ߲ ߘߐ߫

ߛߊ߲ߖߌߓߊ߫ ߣߊ ߓߘߊ߫ ߞߍ߫ ߕߙߎ߬ ߘߌ߫ ߖߋ߬ߟߌ߬ߓߊ߬ߟߊ߫ ߖߊ߬ߥߏ߬ߞߍ߬ ߘߎ߰ߓߊ ߘߏ߫ ߞߣߐ߫ ߞߊ߬ ߡߐ߰ ߁߅߀ ߓߐ߬ߣߐ߫ ߊ߬ ߣߌ ߘߐ߫، ߞߟߊߡߊ߲ߞߏ ߟߎ߬ ߡߊߡߊ߬ߙߊ ߖߋ߬ߕߌ߰ߘߊ ߓߋߟߋ߲ߕߌ߮ ߟߋ߬ ߞߊ߬ ߣߌ߲߬ ߟߊ߬ߛߋ߬ߟߌ ߞߍ߫ ߓߌ߬ ߞߍ߲ߘߍߟߏ߲ ߣߌ߲߬ ߡߊ߬߸ ߞߊ߬ ߓߊ߲߫ ߞߊ߬ ߦߌ߬ߘߊ߬ ߞߏ߫ ߊ߬ ߞߊ߬ߛߙߊ ߦߋ߫ ߕߊ߬ߡߌ߲߬ ߠߊ߫ ߥߙߊ߬ ߟߊ߫ ߟߋ߬.

ߖߋ߬ߟߌ߬ߓߊ߬ߘߎ߰ ߖߌߛߎ߲ߞߋߡߎ߲ ߠߎ߬ ߥߛߊ߬ߓߊ߰ߦߊ ߡߊ߫ ߛߋ߫ ߛߊ߲ߖߌ߫ ߣߊ߬ߣߍ߲ ߓߙߍ߬ߦߊ߬ ߞߋߟߋ߲߫ ߠߊߕߍ߰ ߟߊ߫ ߡߎߣߎ߲߬߸ ߡߍ߲ ߖߌ߰ ߘߊ߫ ߓߌߟߏ߲ ߛߎ ߘߐ߫ ߡߐߞߑߥߊ߫ ߘߎ߱ ߞߣߐ߫߸ ߣߌߖ߭ߍߙ ߞߊ߬ߝߏ ߞߣߐ߫߸ ߞߎߘߍ߫ ߃߀߀ ߦߋ߫ ߦߋ߲߬ ߡߍ߲ ߣߌ߫ ߊߓߎߖߊ߫ ߕߍ߫߸ ߖߡߊ߬ߣߊ ߞߎߓߋߘߊ ߞߊ߬ߣߌ߲߬.

ߕߌ߲߬ߞߎߘߎ߲ ߣߌ߲߬ ߘߐ߫߸ ߞߐ߯ߟߐ ߘߊ߲߬ߠߊߕߊ߬ߡߌ߲߬ ߘߊ߫ ߓߊߟߋ߬ ߊ߬ߟߎ߫  ߞߊ߲߬ ߦߋ߲߬߸ ߞߵߏ߬ ߞߎ߲߭ ߞߍ߫ ߓߊ߲ߘߐߞߘߐߞߟߦߊ߫ ߘߊ߲߬ߠߊߕߊ߬ߡߌ߲߬ߣߍ߲ ߘߌ߫߸ ߏ߬ ߟߋ ߓߘߊ߫ ߣߊ߬ ߥߟߏ߫ ߛߊ߲ߖߌߓߊ߫ ߣߊ ߟߎ߬ ߟߊ߫ ߣߌ߲߬߸ ߞߊ߬ ߖߌߓߐ ߥߙߊ߬.

ߡߐߞߑߥߊ߫ ߛߌ߰ߓߊ߮ ߡߍ߲ ߓߐ߯ ߞߏ߫ ߡߏ߬ߤߊ߬ߡߍ߬ߘ ߞߊߖ߭ߌߡ߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߕߎ߬ߢߊ ߖߍ߬ߘߍߖߍ߬ߘߍ ߦߋ߫ ߡߍ߲ ߘߌ߫߸ ߊ߲ ߓߘߊ߫ ߝߐ߫ ߡߐ߰ ߛߌߦߊߡߊ߲߫ ߠߋ߬ ߟߊ߫ ߖߌߓߐ ߣߌ߲߬ ߘߐ߫߸ ߞߎߡߊߕߍ߫ ߓߟߏߝߋ߲ ߠߎ߬ ߡߊ߬߸ ߛߣߍ߬ ߛߎߡߊ߲ ߠߎ߬߸ ߡߍ߲ ߠߎ߬ ߟߊߡߙߊ߬ߣߍ߲߫ ߕߍ߬ߘߍ߫ ߡߐ߬ߣߐ ߟߎ߬ ߞߣߐ߫߸ ߏ߬ ߟߎ߬ ߓߍ߯ ߟߋ߬ ߥߊߣߍ߲߫ ߖߌ ߟߊ߫߸ ߡߐ߰ ߛߌߦߊߡߊ߲߫ ߝߣߊ߫ ߓߘߊ߫ ߕߏ߫ ߊ߬ ߘߐ߫.>>

ߊ߬ߟߊ߯ߖߌ߬ ߊߟߞߌ߫ ߡߎߛߊ߫ ߡߍ߲ ߦߋ߫ ߡߐߞߑߥߊ߫ ߡߐ߰ߓߊ ߟߎ߬ ߟߊ߫ ߞߎ߲߬ߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ <<ߖߌ߫ ߞߏ ߣߌ߲߬ ߛߎߓߊ߯ߦߊߟߡߊ ߟߋ߬߸ ߡߍ߲ ߕߘߍ߬ ߞߍ߫ ߟߊ߫ ߦߊ߲߬ ߝߟߐ߫߸ ߓߊ߬ߙߌ߬ ߥߊ߯ߕߌ߫ ߟߋ߬ ߕߍ߬ߘߍ߫ ߊ߬ ߟߊ߫، ߊ߬ ߓߊ߯ ߣߊ߬ ߥߊ߯ߕߌ ߢߌ߲߬ ߠߊ߫߸ ߌ ߘߴߊ߬ ߦߋ߫߸ ߊ߬ ߘߌ߫ ߛߋ߫ ߛߊ߲߭ ߂߀ ߞߍ߫ ߟߊ߫߸ ߊ߬ ߡߊ߫ ߣߊ߬، ߏ߬ ߟߋ ߛߎ߮ ߞߍߣߍ߲߫ ߞߎߣߎ߲߬߸ ߖߌ ߟߋ߬ ߓߐߣߍ߲߫ ߞߏߖߎ߯ߦߊ߫߸ ߞߵߏ߬ ߞߍ߫ ߕߌߢߍߟߌ ߣߌ߲߬ ߛߓߊߓߎ ߘߌ߫ ߡߎ߬ߕߎ߲߬ ߛߊ߫.>>

ߖߌ߬ߦߊ߬ߓߍ ߟߎ߬ ߣߌ߫ ߖߌ߬ߦߊ߬ߖߟߎ ߡߍ߲ ߠߎ߬ ߦߋ߫ ߝߌߙߌ߲ߝߌߙߌ߲߫ ߠߊ߫ ߘߍ߬ߞߙߏߝߏ ߟߎ߫ ߞߊ߲߬߸ ߌ ߓߊ߯ ߞߌ߲߬ߘߊ ߘߏ߫ ߟߎ߫ ߦߋ߫߸ ߖߌ ߓߘߊ߫ ߟߊ߫ ߦߙߐ ߓߍ߯ ߟߊ߫߸ ߞߊ߬ ߘߏ߲߬ ߟߎ ߟߎ߬ ߞߣߐ߫، ߘߎ߰ ߡߐ߮ ߟߎ߬ ߖߍ߬ߘߍ ߕߎ߲߬ ߕߴߛߋ߫ ߟߴߊ߬ߟߎ߬ ߓߟߏߝߋ߲߫ ߠߊߘߍ߬ ߟߊ߫ ߡߎ߬ߕߎ߲߬߸ ߤߊߟߌ߬ ߢߐ߲߯ ߡߞߊߘߊ߲߫ ߕߎ߲߬ ߕߴߊ߬ ߘߐ߫ ߡߎ߬ߕߎ߲߬߸ ߝߏ߫ ߖߘߍ߬ ߡߞߊ߬ߘߊ߲.

ߡߐߞߑߥߊ߫ ߘߏ߲߬ ߦߋ߫ ߛߏ߫ ߟߋ߬ ߘߌ߫߸ ߖߎ߬ߟߊ߬ ߛߌߦߊߡߊ߲߫ ߦߋ߫ ߢߐ߲߯ߓߍ߲߬ ߠߊ߫ ߦߙߐ ߡߍ߲ ߘߐ߫߸ ߞߊ߬ ߕߊ߯ ߞߙߊ߬ߖߊߥߏ ߟߎ߫ ߛߊ߲߬ ߦߋ߲߬߸ ߦߏ߫ ߛߐ߬ߛߐ߬ߜߍ ߟߎ߬߸ ߖߊ߬ߓߊ߸ ߞߵߏ߬ ߟߊ߫ ߓߊߟߏ߫ ߛߎߡߊ߲߫ ߛߌߦߊߡߊ߲߫ ߞߊ߲߬߸ ߡߍ߲ ߠߎ߬ ߦߋ߫ ߓߐ߫ ߟߊ߫ ߛߍ߬ߣߍ ߘߐ߫.

ߕߎߟߊߝߌ߲߫ ߕߊ߬ߡߌ߲߬ߣߍ߲ ߡߍ߲ ߦߋ߫ ߣߌ߲߬߸ ߛߊ߲ߖߌ߫ ߥߎ߬ߣߊ߲߬ߞߏߙߏ߲ ߠߋ߬ ߣߊ߬ ߘߊ߫߸ ߝߏ߫ ߞߊ߬ ߘߎ߱ ߢߎߡߍߓߊߟߊ߲ ߘߏ߫ ߞߊߘߌ߫ ߡߊߦߌߘߜ߭ߎߙߌ߫߸ ߞߊ߬ ߖߌ ߞߊߘߌ߫ ߛߏ ߟߊ߫߸ ߞߊ߬ ߡߐ߰ ߃߀ ߓߐ߬ߣߐ߫ ߊ߬ ߣߌ ߘߐ߫߸ ߞߊ߬ ߡߐ߰ ߞߋ߲߬ߥߟߎ ߟߐ߬ ߊ߬ߟߎ߫ ߘߌ߲߬ߞߌߙߊ ߓߌ߬ߟߊ߬ ߟߊ߫، ߏ߬ ߝߣߊ߫ ߕߊ߬ߣߍ߲ ߞߵߊ߬ ߟߊ߫ ߓߞߏ߫ ߤߙߊߡ ߠߊ߫ ߖߤߊ߬ߘߌ߬ ߞߟߍ ߞߊ߲߬ ߦߋ߲߬߸ ߏ߬ ߓߘߊ߫ ߦߋ߲߬ ߛߌ߮ ߜߟߍ߬ߦߊ߬ ߞߏߛߓߍ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫

ߒߞߏ ߝߐ߰ߓߍ߬ߦߊ߬ߟߊ ߞߊ߲ߞߊ߲߫