ߖ߭ߊ߲ߓߌ߫ ߞߊ߲ߕߌ߯ ߞߘߐ ߋߘߑߜ߭ߊߙ ߟߎ߲ߜ߭ߎ߫ ߓߘߊ߫ ߝߊߕߏ߫ ߓߌ߬ ߓߌߟߏ߲ ߣߌ߲߬ ߡߊ߬ ߂߀߂߅ ߥߊ߬ߛߌ߬ߥߙߊ ߕߟߋ߬ ߅߸ ߞߵߊ߬ ߛߌ߬ߞߛߊߓߌ ߕߏ߫ ߛߊ߲߬ ߆߈ ߡߊ߬߸ ߏ߬ ߟߊߛߋ߫ ߘߊ߫ ߝߊ߬ߛߏ߬ ߞߊߣߌ߲ ߞߟߊߘߊ ߟߋ߬ ߓߟߏ߫߸ ߊ߬ ߟߊ߫ ߓߘߍ߬ߓߘߍ߬ߟߌ߬ ߞߙߎߞߊ ߞߊ߬ߣߌ߲߬، ߞߊ߬ߝߏ߬ ߞߎ߲߬ߕߌ߰ ߞߘߐ ߣߌ߲߬ ߛߊ߬ ߘߊ߫ ߔߙߋߕߏߙߌߦߊ߫ ߘߊ߲ߘߊߛߏ ߟߋ߬ ߟߊ߫߸ ߝߘߊ߬ߝߌ߲߬ߠߊ߫ ߥߙߏ߬ߘߎ߮ ߘߐ߫߸ ߊ߬ ߕߍ߬ߘߍ߫ ߦߋ߲߬ ߠߋ߬ ߘߊ߲ߘߊߟߌ ߘߊߞߘߐ߫ ߓߣߊ߬ߛߎ߰ߝߐ ߕߊ߫ ߓߟߏ߫ ߡߊ߬߸ ߡߍ߲ ߞߟߊ߬ ߞߋߟߋ߲߫ ߡߊ߫ ߛߋ߫ ߟߐ߲߫ ߠߊ߫ ߞߵߊ߬ ߛߌ߰ ߛߊ߬ߦߊ ߟߊ߫ ߣߌ߲߬ ߛߊ߫.
ߊ߬ ߟߊ߫ ߛߊ߬ߦߊ ߞߎ߲߬ߠߊ߬ߝߎߟߋ߲ ߔߘߋߔߘߋߟߊߕߍ߰ ߘߴߊ߬ ߘߊ߲ߡߛߏ߫ ߕߊߛߌ߬ߟߊ߬ ߟߎ߲ߜ߭ߎ߫ ߟߋ߬ ߓߟߏ߫߸ ߖߌ߬ߦߊ߬ߖߟߎ߬ ߞߎ߲߬ߞߎ߬ߘߎ߲߬ߣߍ߲ ߘߏ߫ ߘߐ߫߸ ߡߍ߲ ߠߊߖߍ߲ߛߍ߲߫ ߘߴߊ߬ ߓߟߏ߫ ߥߊ߬ߛߌ߬ߥߙߊ ߕߟߋ߬ ߅ ߣߌ߲߬ ߛߐ߱ߡߊ߬.
ߊ߬ ߡߏߦߌ߫ ߘߊ߫ ߁߉߅߆ ߟߋ߬ ߟߊ߫߸ ߋߘߑߜ߭ߊߙ ߟߎ߲ߜ߭ߎ߫ ߞߍ߫ ߘߊ߫ ߖ߭ߊ߲ߓߌ߫ ߞߊ߲ߕߌ߮ ߘߊ߫ ߂߀߁߅ ߟߋ߬ ߟߊ߫߸ ߊ߬ ߢߍߓߊ߮ ߟߊ߫ ߛߊ߬ߦߊ ߞߐ ߘߐ߫߸ ߏ߬ ߡߍ߲ ߕߐ߯ ߞߏ߫ ߡߌ߬ߛ߭ߍߟ ߛߕߊ߫، ߊ߬ ߛߎߥߊ߲ߘߌ߫ ߘߊ߫ ߂߀߁߆ ߟߋ߬ ߟߊ߫߸ ߊ߬ ߞߊ߬ ߖߡߊ߬ߣߊ ߡߙߊ߬ ߤߊ߲߯ ߂߀߂߁، ߊ߬ ߣߊ߬ ߘߊ߫ ߘߊ߬ߘߌ߬ ߤߊߞߍ߲ߘߋ ߤߛ߭ߌߟߋߡߊ߫ ߓߟߏ߫߸ ߏ߬ ߡߍ߲ ߦߋ߫ ߖߡߊ߬ߣߊ ߞߎ߲߬ߠߊ߫ ߕߋ߲߬ ߞߊ߬ߣߌ߲߬، ߏ߬ ߞߍ߫ ߘߊ߫ ߢߣߊߕߊߟߌ߫ ߟߋ߬ ߝߍ߬߸ ߡߍ߲ ߞߎߡߊ ߛߌߦߊߦߊ߫ ߘߊ߫ ߞߏߛߓߍ߫.
ߊ߬ ߟߊ߫ ߟߐ߬ߒ߬ߞߋ߬ߟߊ ߞߎ߲߬ߕߊ߮ ߞߣߐ߫߸ ߟߎ߲ߜ߭ߎ߫ ߞߊ߬ ߛߐ߬ߘߐ߲ ߜߟߍ߬ߦߊ߬ ߛߌߦߊߡߊ߲߫ ߠߋ߬ ߛߐ߬ߘߐ߲߬߸ ߞߊ߬ ߖߊߓߊ߯ߕߐߦߊ ߣߌ߫ ߓߊ߯ߙߓߊߟߌߦߊ ߥߊ߬ߙߴߊ߬ ߕߋ߬ߟߋ ߘߐ߫߸ ߞߊ߬ ߝߘߏ߬ߓߊ߬ ߖߟߎ ߥߊ߬ߙߊ߫ ߖߡߊ߬ߣߊ ߟߊ߫ ߞߊߕߌ߫߸ ߏ߬ ߞߍ߫ ߘߊ߫ ߕߙߎ߬ ߘߌ߫ ߞߵߊ߬߬ ߛߘߊ ߓߋ߬߸ ߞߵߊ߬ ߟߊ߫ ߡߙߊ߬ߞߊ߲ ߘߊߝߘߌ߫ ߞߎߜߋ߫.
ߊ߬ ߗߌߙߏ߲ ߡߍ߲ ߞߍ߫ ߘߊ߫ ߢߣߊߕߊߟߌ ߘߐ߫߸ ߞߊ߲ߕߌ߯ ߞߘߐ ߞߵߊ߬ ߡߊߕߊ߯ ߟߋ߬ ߓߘߍ߬ߓߘߍ߬ߟߌߌ ߟߊ߫ ߔߏ߲߫߸ ߝߏ߫ ߛߊ߲߬ ߠߊ߬ߓߊ߲ ߢߌ߲߬ ߠߎ߬ ߟߊ߫߸ ߊ߬ ߕߎ߲߬ ߞߵߊ߬ ߡߙߌߦߊ ߦߌ߬ߘߊ߬߸ ߞߏ߫ ߊ߬ ߦߴߊ߬ ߝߍ߬ ߞߊ߬ ߛߊ߬ߦߌ߲߬ ߓߘߍ߬ߓߘߍ߬ߟߌ ߞߊߡߊ߲ ߘߐ߫ ߝߊ߬ߛߏ ߞߣߐ߫، ߊ߬ ߟߊ߫ ߡߙߌߦߊ ߏ߬ ߝߣߊ߫ ߛߋ߲߭ ߡߊ߫ ߘߎ߱ ߛߐ߬ߘߐ߲߬߸ ߞߵߏ߬ ߞߎ߲߭ ߞߍ߫ ߛߌ߰ߞߊ߲߬ ߞߕߌߖߌ߲ ߠߊ߫ ߞߊߙߌߢߊ߲߫ ߟߊߣߍ߲ ߘߴߊ߬ ߢߍ߫߸ ߞߏ߫ ߊ߬ ߓߘߊ߫ ߟߐ߬ߒ߬ߞߋ߬ߟߊ߫ ߝߌ߬ߟߊ߬ ߞߍ߫߸ ߞߏ߫ ߊ߬ ߕߴߛߋ߫ ߞߍ߫ ߟߊ߫ ߡߊ߬ߡߌ߬ߘߊ߬ߟߌ߬ߟߊ߫ ߘߌ߫ ߛߎߥߊ߲ߘߟߌ߫ ߝߏߦߌ߬ ߘߐ߫ ߡߎ߬ߕߎ߲߬.
ߋߘߑߜ߭ߊߙ ߟߎ߲ߜ߭ߎ߫ ߟߊ߫ ߛߊ߬ߦߊ ߣߌ߲߬ ߣߐ߬ ߘߊ߲߭ߛߌ߰ ߟߊ߫ ߖ߭ߊ߲ߓߌ߫ ߓߘߍ߬ߓߘߍ߬ߟߌ ߘߝߐ߬ߓߊ ߘߏ߫ ߟߋ߬ ߟߊ߫ ߣߌ߲߬، ߊ߬ ߞߏ߬ߣߌ߲ ߕߐ߮ ߕߍߣߊ߬ ߕߎߣߎ߲߫ ߠߊ߫ ߖߡߊ߬ߣߊ ߘߐ߬ߕߊߡߌ߲ ߘߐ߫ ߡߎ߬ߕߎ߲߬߸ ߞߵߏ߬ ߞߎ߲߭ ߞߍ߫ ߡߎ߲߬ ߘߌ߫߸ ߊ߬ ߕߋ߬ߟߋ ߘߐ߫߸ ߥߙߎߞߌ߫ ߞߏ߫ ߛߌߦߊߡߊ߲߫ ߠߋ߬ ߞߍ߫ ߘߊ߫߸ ߜߟߍ߬ߦߊ߬ ߛߌߦߊߡߊ߲߫ ߝߣߊ߫ ߛߐ߬ߘߐ߲߬ ߘߊ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫
ߒߞߏ ߝߐ߰ߓߍ߬ߦߊ߬ߟߊ ߞߊ߲ߞߊ߲߫
