ߞߊ߬ ߓߍ߲߬ ߌߙߊ߲߫ ߣߌ߫ ߌߛߌ߬ߙߊ߬ߌߟߊ߫ ߟߊ߫ ߥߊ߬ߟߏ߲߬ߠߌ߲ ߠߎ߬ ߡߊ߬߸ ߌߛߌ߬ߙߊ߬ߌߟߊ߫ ߞߏߕߌ߯ ߝߟߐ ߓߘߊ߫ ߓߐ߫ ߞߊ߬ ߞߎߡߊ߫߸ ߞߊ߬ߦߌ߯ ߛߌ߬ߣߌ߲߬ߟߏ߲ ߕߊ߬ߡߌ߲߬ߣߍ߲ ߡߊ߬߸ ߌߛߌ߬ߙߊ߬ߌߟߊ߫ ߞߊ߬ ߞߍ߬ߟߍ ߟߊߥߟߌ߬ ߌߙߊ߲߫ ߞߊ߲ߡߊ߬߸ ߞߍ߬ߟߍ ߟߊ߬ߢߌߣߌ߲ ߦߋ߫ ߡߍ߲ ߘߌ߫߸ ߏ߬ ߟߋ߬ ߦߋ߫ ߡߎߖߎ߯ߞߏ ߣߌ߫ ߓߊ߰ߓߊ߰ߟߌ߬ߞߏ  ߓߍ߯ ߛߋ߲߬ߠߊߛߌ߬ߘߌ ߘߌ߫߸ ߕߟߋ߬ߓߐ ߕߊ߲ߓߊ߲ ߘߐ߫، ߊ߬ ߘߏ߲߬߸ ߊ߬ ߕߘߍ߬ ߓߘߊ߫ ߦߌ߬ߘߊ߬ ߞߏ߫ ߌߙߊ߲߫ ߣߌ߫ ߡߎߖߎ߯ߞߏ ߛߐ߬ߘߐ߲ ߕߍ ߡߊ߲߫ ߖߊ߲߬ ߓߎ߬ߕߎ߲߬؛ ߞߍ߬ߟߍ ߘߊߡߌ߬ߣߊ ߟߐ߯ߞߎ߲߫ ߞߋߟߋ߲߫ ߠߋ߬ ߕߋ߲߬߸ ߌߛߌ߬ߙߊ߬ߌߟߊ߫ ߞߏߕߌ߯ ߞߙߎ ߢߍߡߐ߮ ߓߍ߲ߖߊߡߍ߲߫ ߣߋߕߊߣߌߦߊߤߎ߫ ߟߊ߫ ߞߎߡߊ߫ ߘߐ߫߸ ߊ߬ߟߎ߬ ߓߍߣߊ߬ ߘߊ߲߭ ߛߌ߰ ߟߋ߬ ߓߊ߰ߓߊ߰ߟߌ߬ߞߏ ߟߎ߬ ߟߊ߫߸ ߞߊ߬ ߝߘߴߊ߬ ߟߊ߫ ߖߡߊ߬ߣߊ ߟߊ߫.

ߞߊ߬ ߓߍ߲߬ ߌߛߌ߬ߙߊ߬ߌߟߊ߫ ߣߌ߫ ߌߙߊ߲߫ ߠߊ߫ ߞߍ߬ߟߍ ߣߌ߲߬ ߡߊ߬߸ ߓߍ߯ ߛߌ߰ߣߍ߲ ߦߋ߫ ߕߟߏߡߊߟߐ ߘߐ߫ ߥߊ߯ߕߌ߫ ߣߌ߲߬ ߠߊ߫߸ ߘߏߣߊߟ ߕߑߙߐ߲ߔ ߡߊߞߐ߬ߣߐ߲ ߘߐ߫، ߣߴߊ߬ ߘߌ߫ ߛߐ߲߬ ߞߵߊ߬ ߛߋ߲߭ ߘߏ߲߬ ߌߛߌ߬ߙߊ߬ߌߟߊ߫ ߣߌ߫ ߌߙߊ߲߫ ߠߊ߫ ߞߍ߬ߟߍ ߣߌ߲߬ ߘߐ߫، ߓߊ߬ߙߌ߬߸ ߙߎ߬ߛߌ߬ ߝߣߊ߫ ߓߘߴߊ߬ ߟߊߛߋ߫ ߓߌ߬߸ ߞߏ߫ ߊߡߙߌߞߌ߬ ߞߊߣߵߊ߬ ߛߋ߲߭ ߘߏ߲߬ ߞߍ߬ߟߍ ߣߌ߲߬ ߘߐ߫ ߢߊ߫ ߛߌ߫ ߟߋ߬ ߡߊ߬، ߣߴߏ߬ ߕߍ߫߸ ߞߏ߫ ߊ߬ ߞߍ߬ߟߍ ߝߊ߲߬ߞߊ ߘߌ߫ ߕߊ߬ߡߌ߲߬ ߥߙߊ߬ߦߊ߫ ߟߊ߫.

ߓߌ߬߸ ߓߌߟߏ߲ ߣߌ߲߬ ߡߊ߬߸ ߌߙߊ߲߫ ߣߌ߫ ߌߛߌ߬ߙߊ߬ߌߟߊ߫ ߞߊ߬ ߡߎ߮ ߟߊߝߟߌ ߟߋ߬ ߞߍ߫ ߢߐ߲߮ ߡߊ߬߸ ߞߊ߬ ߡߐ߰ ߄߅ ߖߐߞߌ߫ ߌߛߌ߬ߙߊ߬ߌߟߞߊ ߟߎ߬ ߘߐ߫، ߌߛߌ߬ߙߊ߬ߌߟߊ߫ ߣߊ߲߬ߕߌ߰ ߝߊ߲ߞߊ ߘߏ߫ ߟߎ߫ ߞߵߊ߬ߟߎ߬ ߞߎ߲߭ߟߐ߬ ߟߋ߬߸ ߌߙߊ߲߫ ߝߕߌߡߊ߫ ߘߊ߮ ߘߏ߫ ߟߎ߫ ߞߊ߲߬߸ ߣߊߕߊ߲ߖ߭ ߣߌ߫ ߊߙߊߞ، 

ߌߙߊ߲߫ ߣߌ߫ ߌߛߌ߬ߙߊ߬ߌߟߊ߫ ߟߊ߫ ߝߕߌߣߊ߲ߖߎ߮ ߟߎ߬ ߦߋ߫ ߛߋ߲߬ߠߊ߫ ߤߊߟߌ߬ ߓߌ߬߸ ߌߙߊ߲߫ ߓߊߙߊ߲ߕߏ߫ ߥߎߟߋ߲ ߞߵߊ߬ ߟߊߥߊ߲߬ߞߊ߬ ߟߋ߬ ߓߌ߬߸ ߞߏ߫ ߌߛߌ߬ߙߊ߬ߌߟߊ߫ ߟߊ߫ ߓߌ߬ߢߍ߬ߞߎߟߎ߲ ߘߏ߫ ߓߋ߬ ߘߊ߫ ߟߋ߬ ߊ߬ߟߎ߬ ߟߊ߫ ߘߊ߮ ߞߊ߲߬، ߊ߲ ߞߏ߬ߣߌ߲ ߡߴߊ߬ ߟߐ߲߫ ߝߟߐ߫߸ ߣߌ߫ ߡߐ߰ ߖߐߞߌ߫ ߘߊ߫ ߟߋ߬ ߥߟߊ߫ ߍ߲߬ߍ߲߫߹ ߡߐ߰ ߛߊ߬ ߘߊ߫ ߟߋ߬؛ ߘߏߣߊߟ ߕߑߙߐ߲ߔ ߓߘߴߊ߬ ߦߌ߬ߘߊ߬ ߞߏ߫ ߌߙߊ߲߫ ߦߋ߫ ߞߎߡߊߢߐ߲߯ߦߊ ߘߏ߫ ߟߊߢߌߣߌ߲߫ ߊ߬ ߝߍ߬߸ ߡߎ߮ ߕߋ߫ ߡߊ߲ߞߊ߲ ߘߏ߫ ߟߎ߫ ߟߋ߬ ߡߍ߲ ߘߊ߫ ߓߌ߬߸ ߕߋߙߊ߲߫ ߘߎ߱ ߞߣߐ߫߸ ߞߏ߬ߣߌ߲ ߊ߬ ߡߊ߫ ߟߐ߲߫ ߣߌ߫ ߌߛߌ߬ߙߊ߬ߌߟߊ߫ ߟߋ߬ ߣߐ߬ ߦߋ߫ ߏ߬ ߘߌ߫ ߓߊ߬ ߥߟߊ߫ ߊ߬ ߘߌ߫ ߞߍ߫ ߌߙߊ߲߫ ߖߍ߬ߘߍ ߟߊ߫ ߟߊ߬ߞߊ߲߬ߘߊ߬ߟߌ ߓߊ߯ߙߊ ߟߎ߬ ߟߋ߬ ߘߌ߫.

ߓߊߙߊ߲ߕߏ߲߫ ߥߎߟߋ߲ ߞߏ߬ߣߌ߲ ߓߘߴߊ߬ ߟߊߛߋ߫ ߞߏ߫ ߓߌ߬ߢߍ߬ߞߎߟߎ߲ ߘߏ߫ ߓߘߊ߫ ߓߋ߬ ߊ߬ߟߎ߬ ߟߊ߫ ߘߊ߮ ߞߊ߲߬߸ ߊ߬ ߞߏ߬ߣߌ߲ ߞߵߊ߬ ߟߊߜߍ߫ ߟߋ߬ ߞߏ߫ ߊ߬ ߡߊ߫ ߢߍߛߌ߲߫ ߊ߬ߟߎ߬ ߟߊ߫ ߘߊ߮ ߡߊ߬، ߌߛߌ߬ߙߊ߬ߌߟߊ߫ ߞߟߍ߬ߓߟߏ ߞߏߕߌ߮ ߞߵߊ߬ ߟߊߥߊ߲߬ߞߊ߫ ߟߋ߬ ߞߏ߫ ߊ߬ߟߎ߬ ߓߘߊ߫ ߌߙߊ߲߫ ߞߣߐߞߏ ߟߊ߬ߞߊ߲߬ߘߊ߬ߟߌ߬ ߘߊ߮ ߕߋ߬߸ ߌߙߊ߲߫ ߝߣߊ߫ ߣߐ߬ ߏ߬ ߟߋ߬ ߕߊߖߟߎߛߙߊ ߞߍ߫ ߟߊ߫ ߞߊ߬ ߌߛߌ߬ߙߊ߬ߌߟߊ߫ ߟߊ߫ ߘߎ߲߬ߘߎ߲߬ߡߊ߬ ߝߎ߲߬ߠߊ߬ߝߎ߬ߟߋ߲߬ߛߏ ߝߌ߬ߟߊ߫ ߕߋ߬؛ ߞߍ߬ߟߍ ߣߌ߲߬ ߞߏ߬ߣߌ߲ ߦߴߊ߬ ߕߟߋ߬ ߇ ߡߊߜߍ߲ ߠߋ߬ ߘߐ߫ ߕߋ߲߬߸ ߡߐ߰ ߅߈߀ ߣߌ߫ ߞߐ߫ ߟߋ߬ ߓߣߐ߬ ߘߴߊ߬ߟߎ߬ ߣߌ ߘߐ߫ ߌߙߊ߲߫ ߞߣߐ߫߸ ߖߐߞߟߌߓߊ߯ߕߐ ߟߎ߬ ߘߌ߫ ߡߐ߰ ߁ ߀߀߀ ߢߐ߲߰ ߓߐ߫، ߞߊ߬ ߡߐ߰ ߂߄ ߓߣߐ߬ ߊ߬ߟߎ߬ ߣߌ߫ ߘߐ߫ ߌߛߌ߬ߙߊ߬ߌߟߊ߫ ߞߣߐ߫߸ ߏ߬ ߖߐߞߟߌߓߊ߯ߕߐ ߘߌ߫ ߡߐ߰ ߁߀߀ ߢߐ߲߰ ߓߐ߫.

ߛߊ߰ߓߊ߰ߕߐ ߝߊ߲ߓߊ ߟߎ߬ ߞߍߣߍ߲߫ ߘߎ߰ߘߋ߲ ߠߎ߬ ߟߋ߬ ߘߌ߫߸ ߘߍ߬ߡߍ߲߬ߠߌ߲ ߛߌ߲߬ߝߏ߲߬ߧߊ߬ߘߊ ߟߊ߫ ߝߐߟߌ߫ ߘߐ߫ ߞߊ߬ߣߌ߲߬߸ ߏ߬ ߟߋ߬ ߖߍ߬ߘߍ ߞߏߛߐ߲߬ ߊ߬ߟߎ߫ ߓߘߴߊ߬ ߟߊߢߌߣߌ߲߫ ߌߙߊ߲߫ ߣߌ߫ ߌߛߌ߬ߙߊ߬ߌߟߊ߫ ߝߍ߬߸ ߊ߬ߟߎ߬ ߦߋ߫ ߓߍ߲߭ ߟߊߢߌߣߌ߲߫ ߛߊ߫ ߘߎ߰ߘߋ߲ ߠߎ߬ ߘߌ߫ ߟߊߞߊ߲ߘߊ߫، ߊߡߙߌߞߌ߬ ߞߊ߲ߕߌ߮ ߞߏ߬ߣߌ߲ ߓߘߴߊ߬ ߟߊߛߋ߫ ߞߏ߫ ߌߙߊ߲߫ ߦߋ߫ ߞߎߡߊߢߐ߲߯ߦߊ ߟߊߢߌߣߌ߲߫ ߊ߬ ߝߍ߬߸ ߖߐ߲߰ߛߊ߫ ߞߍ߬ߟߍ ߘߌ߫ ߛߋ߫ ߞߊ߬ ߘߊߓߌ߬ߟߊ߫، ߘߏߣߊߟ ߕߑߙߐ߲ߔ ߞߊ߬ ߢߌ߬ߣߌ߲߬ߞߊ߬ߟߌ ߟߋ߬ ߞߍ߫ ߝߣߊ߫߸ ߞߏ߫ ߡߎ߲߬ ߘߐ߫ ߊ߬ߟߎ߬ ߡߊ߫ ߛߐ߲߬ ߞߎߡߊߢߐ߲߯ߦߊ ߟߎ߬ ߡߊ߬߸ ߦߊ߬ߣߌ߫ ߊ߬ ߦߋ߫ ߝߐ߫ ߞߏ߫ ߞߍ߬ߟߍ ߝߊ߲߬ߞߊ ߓߘߊ߫ ߓߏ߲߬ߧߊ߬߸ ߤߊ߲߯ ߞߊ߬ ߝߊ߰ߟߌ ߛߌߦߊߦߊ߫؟ ߓߊ߬ߙߌ߬߸ ߌߙߊ߲߫ ߞߎ߲߬ߠߊ߬ߛߌ߮ ߟߎ߬ ߞߊ߬ ߘߏߣߊߟ ߕߑߙߐ߲ߔ ߟߊ߫ ߞߎߡߊ ߣߌ߲߬ ߓߐ߬ߘߍ߬ߓߐ ߟߋ߬߸ ߞߏ߫ ߡߐ߰ ߛߌ߫ ߡߴߊ߬ ߟߊߢߌߣߌ߲߫ ߘߏߣߊߟ ߕߑߙߐ߲ߔ ߝߍ߬߸ ߊ߬ ߣߌ߫ ߌߛߌ߬ߙߊ߬ߌߟߊ߫ ߦߋ߫ ߞߎߡߊߢߐ߲߯ߦߊ ߟߎ߬ ߞߍ߫.

ߣߌ߲߬ ߞߍ߫ ߘߊ߫߸ ߊߛߏߢߊ߫ ߡߊ߬ߙߊ ߟߋ߬ ߘߐ߫߸ ߛߎߘߊ߲߫ ߓߐߕߏ߲ ߠߊ߫، ߥߛߊ߬ߘߋ߲ ߁߄ ߞߊ߬ ߟߊ߬ߥߊ߲߬ߞߊ߲߬ߠߌ߲ ߘߏ߫ ߟߊߓߐ߫ ߞߊ߬ ߝߊ߰ߟߌ ߣߌ߲߬ ߡߊߞߕߌ߫߸ ߞߎߣߎ߲߬ ߗߊߘߌ߬ ߞߏߟߊߕߍ߮ ߟߎ߬ ߞߊ߬ ߘߌߦߊߜߏߦߊ߫ ߟߊߕߍ߮ ߘߏ߫ ߕߊ߬߸ ߥߘߊߦߌ߫ ߡߊ߬ߙߊ ߞߣߐ߫߸ ߞߊ߬ ߓߐ߫ ߥߎ߬ߙߊ ߝߍ߬ ߁߈ ߙߋ߲ ߥߊ߯ߕߌ ߟߊ߫، ߞߵߊ߬ ߛߌ߰ ߛߐ߰ߡߊ߬ߘߊ ߆ ߕߎߡߊ ߟߊ߫؛ ߛߌߦߊ߫ ߞߟߍ ߞߊ߫ ߜߍ߬ߟߍ߲߬߸ ߕߎߡߊ ߘߏ߫ ߟߎ߫ ߟߊ߫߸ ߊ߬ ߘߌ߫ ߞߍ߫ ߛߣߍ߬ ߞߍ߬ߟߊ ߟߎ߬ ߣߌ߫ ߓߌߦߊ߲߫ ߡߙߊߟߊ ߟߎ߬ ߘߌ߫߸ ߌ ߘߴߊ߬ ߦߋ߫ ߏ߬ ߟߎ߬ ߕߍ߫ ߢߐ߲߮ ߢߍ߫ ߛߌߟߊ߫ ߘߐ߫ ߖߘߍ߬؛ ߓߊ߬ߙߌ߬߸ ߊ߬ ߛߌߦߊߡߊ߲߫ ߦߋ߫ ߞߍ߫ ߟߊ߫ ߓߋ߬ߒ߬ߞߊ߲߬ߠߌ߲߬ ߞߍ߬ߟߊ ߟߎ߬ ߟߋ߬ ߘߌ߫.

ߞߍ߬ߟߍ ߡߍ߲߬ ߠߎ߬ ߞߎ߲߭ ߞߊ߫ ߛߌߦߊ߫߸ ߒ߬ߞߊ߬߸ ߞߙߐ߬ߛߌ߬ߟߌ ߓߟߏߡߊ߬، ߛߊ߲߬ ߄ ߣߌ߫ ߅ ߕߍߟߊ ߘߐ߫߸ ߛߌߦߊߡߊ߲߫ ߠߋ߬ ߓߘߊ߫ ߝߙߊ߬ ߛߣߍ߬ߞߍ߬ߟߊ ߟߎ߬ ߣߌ߫ ߓߌߦߊ߲߫ ߡߙߊߟߊ ߟߎ߬ ߟߊ߫ ߝߘߌߢߐ߲߯ߘߐ ߞߊ߲߬؛ ߕߎ߬ߡߊ ߘߏ߫ ߟߎ߫ ߟߊ߫ ߖߘߍ߬ ߡߐ߱ ߞߎ߲߬ߞߋ߬ߟߋ߲ ߠߎ߬ ߘߌ߫ ߓߌ߬ߟߊ߬ ߢߐ߲߯ ߠߊ߫߸ ߏ߬ ߟߊߓߊ߲ ߘߌߣߊ߬ ߞߍ߫ ߛߌߦߊ߫ ߞߟߍ ߘߌ߫، ߏ߬ ߟߋ߬ ߘߐ߫߸ ߣߴߌ ߞߊ߬ ߞߍ߬ߟߍ ߡߍ߲߬ ߠߎ߫ ߥߏ߬ߢߊ ߟߎ߬ ߡߊߝߟߍ߫߸ ߕߐ߰ߡߊ߬ߛߙߋ߬ ߛߌߦߊߡߊ߲߫ ߦߴߊ߬ߟߎ߬ ߟߊ߫، ߡߍ߲ ߞߍ߫ ߘߊ߫ ߥߊ߬ߛߌ߬ߥߙߊ ߕߟߋ߬ ߁߀ ߠߊ߫߸ ߥߘߊߦߌ߫ ߡߊ߬ߙߊ ߘߐ߫، ߏ߬ ߛߊߓߎ ߞߍ߫ ߘߊ߫ ߓߋ߬ߒ߬ߞߊ߲߬ߠߌ߲ ߠߋ߬ ߘߌ߫.

ߌߙߊ߲߫ ߢߍߡߌߘߊ ߞߊ߬ ߞߎߡߊ ߕߊ߬ ߟߋ߬ ߓߌ߬߸ ߌߛߌ߬ߙߊ߬ߌߟߊ߫ ߟߊ߫ ߞߍ߬ߟߍ ߞߍ߫ ߕߟߋ߬ ߥߐ߯ߙߐ ߡߊ߬، ߞߵߊ߬ ߢߍߛߌ߲߫ ߊ߬ ߟߊ߫ ߖߡߊ߬ߣߊ ߡߊ߬߸ ߊߦߊߕߏߟߊ߫ ߊ߬ߟߌ ߞߊߡߣߋ߫ ߟߊ߫ ߞߎߡߊ߫ ߘߐ߫ ߞߏ߫ ߌߙߊ߲߫ ߕߍߣߵߊ߬ ߖߍ߬ߘߍ ߟߊߓߌ߬ߟߊ߬ ߟߊ߫ ߖߊ߲߬ߞߌ߬ߟߌ ߟߎ߬ ߦߋ߫߸ ߊ߬ ߞߊ߬ ߟߊ߬ߥߊ߲߬ߞߊ߲߬ߠߌ߲ ߣߌ߲߬ ߞߍ߫ ߌߙߊ߲߫ ߝߘߏ߬ߓߊ߬ ߥߎߦߊ߲ߓߍ߲ ߛߊ߲ߘߐ߫ ߟߋ߬ ߟߊ߫، ߞߏ߫ ߌߙߊ߲߫ ߕߍߣߊ߬ ߓߍ߲߬ ߘߊ߫ ߢߊ߫ ߛߌ߫ ߟߋ߬ ߡߊ߬߸ ߞߊ߬ ߓߍ߲߭ ߘߌߦߊߜߏߦߴߊ߬ ߞߊ߲߬ ߥߟߊ߫ ߖߡߊ߬ߣߊ߬ ߛߌ߫ ߟߋ߬ ߟߊ߫ ߖߊ߲߬ߞߌ߬ߟߌ ߢߊߞߘߐ߫؛ ߣߌ߲߬ ߠߋ߬ ߞߍ߫ ߘߊ߫ ߌߙߊ߲߫ ߢߍߡߐ߯ߓߊ ߣߌ߲߬ ߠߊ߫ ߞߎߡߊ ߘߌ߫.

ߊ߬ ߝߐߣߍ߲߫ ߞߐ ߘߏߣߊߟ ߕߑߙߐ߲ߔ ߓߟߏ߸ ߞߏ߫ ߌߙߊ߲߫ ߦߋ߫ ߞߍ߬ߟߍ ߟߊߟߐ߬ ߘߌߦߊߜߏߦߊ߫ ߓߟߏߡߊ߬߸ ߊ߬ߟߌ ߞߊߡߣߋ߫ ߟߊߓߊ߲ ߣߊ߬ ߘߊ߫ ߞߊ߲߬ߞߊ߬ߙߌ߬ߡߊ߬ߘߊ ߞߍ߫، ߊߡߙߌߞߌ߬ ߦߋ߫ ߞߏ߫ ߌߙߊ߲߫ ߕߍߣߊ߬ ߛߋ߫ ߟߊ߫ ߘߌ߬ߢߍ߬ ߟߊ߫ ߕߊߖߟߎߛߙߊߞߏ ߘߐ߫ ߢߊ߫ ߛߌ߫ ߟߋ߬ ߡߊ߬߸ ߞߏ߫ ߊߡߙߌߞߌ߬ ߞߏ߬ߣߌ߲ ߞߊ߬ ߝߌ߬ߟߌ ߟߋ߬ ߞߍ߫߸ ߊ߬ ߞߍ ߘߐ߫ ߞߵߊ߬ ߟߊ߫ ߌߛߌ߬ߙߊ߬ߌߟߊ߫ ߞߊ߲߬߸ ߞߊ߬ ߌߙߊ߲߫ ߞߟߍ߬، ߊ߬ ߟߊ߫ ߝߐߟߌ߫ ߘߐ߫ ߝߣߊ߫߸ ߌߙߊ߲߫ ߕߍߣߊ߬ ߢߌ߬ߣߊ߬ ߟߴߊ߬ ߟߊ߫ ߖߋ߬ߟߌ߫ ߓߐ߬ߣߍ߲ ߠߎ߬ ߞߐ߫؛ ߊ߬ ߣߴߊ߬ߟߎ߬ ߛߊ߯ ߘߊ߫ ߡߍ߲ ߠߎ߬ ߞߍ߫ ߘߊ߫ ߓߊ߰ߓߊ߰ߟߌ߬ߟߊ ߟߎ߬ ߓߟߏ߫.

ߞߊ߬ ߓߍ߲߬ ߟߐ߯ߞߎ߲߫ ߕߊ߬ߡߌ߲߬ߣߍ߲ ߓߋ߬ߒ߬ߞߊ߲߬ߠߌ߲߬ ߖߎ߮ ߟߎ߬ ߡߊ߬ ߦߋߟߑߥߊߕߊ߫، ߏ߬ ߡߍ߲ ߓߋ߬ߒ߬ߞߊ߲߬ߠߌ߲ ߝߊ߰ߓߊ߰ߕߐ ߛߋ߫ ߘߊ߫ ߡߐ߰ ߁߀߀ ߣߌ߫ ߞߐ߫ ߘߐ߫߸ ߖߡߊ߬ߣߊ߬ߘߋ߲ ߠߎ߬ ߞߏ߬ߣߌ߲ ߛߌߟߊ߲ߡߍߣߍ߲ߕߐ ߦߋ߫ ߛߌ߱ ߘߐ߫߸ ߦߊ߬ߣߌ߫ ߊ߬ ߦߋ߫ ߝߐ߫ ߞߏ߫ ߕߌߣߎߓߎ߫ ߓߘߊ߫ ߛߣߍߡߊ߫ ߦߋߟߑߥߊߕߊ߫ ߘߎ߱ ߞߣߐ߫، ߞߊ߬ ߓߍ߲߬ ߓߋ߬ߒ߬ߞߊ߲߬ߠߌ߲ ߓߏ߲߬ߧߊ߬ ߞߏߖߎ߮ ߡߊ߬߸ ߖߡߊ߬ߣߊ ߞߣߐ߫؛ ߝߏ߫ ߊ߬ ߓߘߊ߫ ߞߍ߫ ߕߙߎ߬ ߘߌ߫ ߓߍߣߎߦߋ߫ ߡߙߊ߬ߓߟߏ ߟߎ߬ ߓߘߊ߫ ߞߟߌߟߌ ߓߌ߬ߟߊ߬ ߖߋ߬ߟߌ߬ߓߊ߬ߟߊ߫ ߞߎ߲߬ߠߊ߬ߛߌ߮ ߟߎ߬ ߡߊ߬، ߖߐ߲߰ߛߊ߫ ߏ߬ ߟߎ߬ ߘߴߊ߬ߟߎ߫ ߘߍ߬ߡߍ߲߬ ߟߊ߬ߞߊ߲߬ߘߊ߬ߟߌ ߛߌߟߊ ߝߍ߬߸ ߟߊ߬ߞߊ߲߬ߘߊ߬ߟߌ ߢߊߟߐ߲ߓߊ߮ ߟߎ߬ ߣߌ߫ ߛߌ߰ߘߊ߮ ߢߍߡߐ߮ ߟߎ߬ ߞߏ߬ߣߌ߲ ߓߘߴߊ߬ ߦߌ߬ߘߊ߬ ߞߏ߫ ߖߋ߬ߟߌ߬ߓߊ߬ߟߊ߫ ߞߊ߲ߕߌ߮ ߟߊ߫ ߕߊ߯ߡߊ ߣߌ߲߬ ߞߍߕߐ߫ ߕߎ߬ߡߊ߬ ߢߌ߬ߡߊ߬ߓߊ ߟߋ߬ ߟߊ߫.

ߓߊߏ߬߸ ߞߴߏ߬ ߘߌ߫ ߞߍ߫ ߛߊߓߎ߫ ߘߌ߫߸ ߕߌߣߎߓߎ߫ ߓߍߣߵߊ߬ ߟߊ߫ ߘߍ߬ߡߍ߲ ߦߌ߬ߘߊ߬ ߦߋߟߑߥߊߕߊߞߊ ߟߎ߬ ߟߊ߫، ߏ߬ ߘߐ߫ ߞߏ߫ ߕߌߣߎߓߎ߫ ߟߊ߫ ߝߏ߬ߟߌ ߞߊߣߊ߬ ߘߊ߲߬ ߞߊ߬ߛߙߊ߬ߓߊ߰ߕߐ ߟߎ߬ ߟߊ߫ ߡߐ߱ ߟߎ߬ ߝߏ߬ߟߌ ߘߐߙߐ߲߫ ߡߊ߬ ߘߋ߬߸ ߊ߬ ߞߊ߫ ߞߊ߲߫ ߠߋ߬ ߝߣߊ߫߸ ߞߊ߬ ߝߙߍ߬ ߖߐ߲ߖߐ߲߫ ߠߎ߫ ߕߊ߬، ߛߊ߫ ߞߊ߬ ߟߊ߬ߞߊ߲߬ߘߊ߬ߟߌ ߝߊ߲߬ߞߊ߫ ߘߏ߲߬߸ ߊ߬ ߣߌ߫ ߞߊ߬ ߝߌߘߊ߫ ߞߎ߲߬ߘߐ߬ߖߊ߲ ߛߐ߬ߘߐ߲߬ ߜߟߍ߬ߦߊ ߟߎ߬ ߟߊ߫، ߦߟߌߓߌߟߊߟߌ ߓߟߏߡߊ߬߸ ߞߵߊ߬ ߕߊ߬ ߛߌ߬ߣߌ߲߬ߟߏ߲ ߕߊ߬ߡߌ߲߬ߣߍ߲  ߛߎ ߡߊ߬߸ ߞߣߵߊ߬ ߛߌ߰ ߞߍ߲ߘߍߟߏ߲ ߠߊ߫، ߡߙߊ߬ߡߊ߬ߝߋ߲߬ߕߌ߰ ߞߙߎ ߟߎ߬ ߞߊ߬ ߦߋߟߑߥߊߕߊ߫ ߘߎ߱ ߟߊߡߌߣߌ߲߫ ߠߋ߬߸ ߞߊ߬ ߞߌ߬ߛߍ ߓߌ߬ߟߊ߫ ߘߊߡߌ߬ߣߊ߬ ߘߎ߰ߘߋ߲ ߠߎ߬ ߞߊ߲߬، ߞߎߡߊ ߞߎ߲߬ߘߏ߲ ߘߐ߫߸ ߛߙߋ ߟߎ߬ ߟߊ߫ ߝߐߟߌ߫ ߘߐ߫، ߊ߬ ߣߌ߫ ߞߊ߬ ߟߎ߫ ߛߌߦߊߡߊ߲߫ ߝߣߊ߫ ߖߋ߬ߣߌ߲߬.