ߜ߭ߊ߯ߖ߭ߊ߬: ߌߛߌ߬ߙߊ߬ߌߟߊ߫ ߓߘߊ߫ ߡߙߊ߬ߒ߬ߡߊ߬ߟߌ߬ ߞߎߘߊ߫ ߞߍ߫ ߞߊ߬ ߡߐ߰ ߆߀ ߝߊ߰ ߕߎ߬ߡߊ߬ߙߋ߲߫ ߂߄ ߞߣߐ߫

ߕߎ߬ߡߊ߬ߙߋ߲߬ ߂߄ ߟߊ߬ߓߊ߲ ߣߌ߲߬ ߞߣߐ߫߸ ߔߊߟߍߛߑߕߌߣߌ߲ߞߊ߫ ߡߐ߰ ߆߀ ߟߋ߬ ߝߊ߰ ߘߊ߫ ߌߛߌ߬ߙߊ߬ߌߟߊ߫ ߟߊ߫ ߡߙߊ߬ߒ߬ߡߊ߬ߟߌ ߓߟߏ߫ ߜ߭ߊ߯ߖ߭ߊ߬ ߞߣߐ߫، ߏ߬ ߞߎߡߊ ߝߐ߫ ߘߊ߫ ߔߊߟߍߛߑߕߌߣߌ߲߬ ߜߋߙߋ߲ߜߋߙߋ߲ߧߊ ߞߏߕߌ߯ߘߊ ߟߋ߬ ߓߟߏ߫ ߟߊ߬ߛߋ߬ߟߌ߬ ߞߟߊߒߞߋ ߘߏ߫ ߞߣߐ߫߸ ߊ߲ ߘߍ߬ߢߐ߲߮ ߘߏ߫ ߟߎ߫ ߢߊ ߛߙߋߦߊ߫ ߘߊ߫ ߡߍ߲ ߡߊ߬، ߊ߬ ߦߌ߬ߘߊ߬ߣߍ߲߫ ߛߓߍ ߞߋߟߋ߲ ߣߌ߲߬ ߞߣߐ߫ ߝߣߊ߫߸ ߞߏ߫ ߞߍ߬ߟߍ ߣߌ߫ ߥߊ߬ߥߎߟߋ ߥߌ߬ߟߌ ߂߀߂߃ ߞߏ߲ߓߌߕߌ߮ ߕߟߋ߬ ߀߇ ߡߊ߬߸ ߏ߬ ߣߌ߫ ߛߌߛߌ߲߬ ߕߍ ߘߐ߫߸ ߡߐ߰ ߅߄ ߃߈߁ ߠߋ߬ ߓߘߊ߫ ߝߊ߰.

ߞߵߊ߬ ߟߴߊ߬ ߞߊ߲߬߸ ߡߐ߰ ߂߈߄ ߠߋ߬ ߖߐߞߌߓߊ߯ߕߐ ߕߊ߬ߣߍ߲߫ ߞߊ߬ ߥߴߊ߬ ߘߌ߫ ߘߊ߲ߘߊߛߏ ߟߎ߬ ߟߊ߫ ߕߎ߬ߡߊ߬ߙߋ߲߫ ߂߄ ߣߌ߲߬ ߞߣߐ߫߸ ߏ߬ ߡߍ߲ ߝߣߊ߫ ߓߘߊ߫ ߞߍ߫ ߕߙߎ߬ ߘߌ߫ ߞߊ߬ ߕߊ߬ߡߌ߲߬ ߖߐߞߌߓߊ߯ߕߐ ߟߎ߬ ߦߙߌߞߊ ߡߊߞߊ߬ߝߏ߬ ߟߊ߫ ߞߍ߬ߟߍ ߖߎ߬ߛߌ߮ ߣߌ߫ ߓߌ߬ ߕߍ ߘߐ߫߸ ߏ߬ ߟߎ߬ ߡߍ߲ ߠߎ߬ ߦߋ߫ ߡߐ߰ ߁߂߄ ߀߅߄ ߘߐ߫ ߕߋ߲߬ ߞߊ߬ߣߌ߲߬، ߊ߬ ߘߏ߲߬߸ ߡߍ߲ ߠߎ߬ ߝߣߊ߫ ߡߊߘߌߡߌ߲ߣߍ߲ ߦߋ߫ ߜ߭ߊ߯ߖ߭ߊ߬ ߞߐ߰ߘߎ߮ ߘߐ߫߸ ߏ߬ ߟߎ߫ ߛߋ߲߬ ߕߍ߫ ߦߙߌߞߊ ߢߌ߲߬ ߘߐ߫߸ ߓߊ ߦߋ߲߬ ߡߊߛߐ߬ߘߐ߲ ߦߋ߫ ߓߊ߲߬ߓߊ߬ ߓߏ߬ ߟߊ߬ߦߟߍ ߟߋ߬ ߘߌ߫.

ߊ߬ ߛߓߍߣߍ߲߫ ߟߊ߬ߛߋ߬ߟߌ ߣߌ߲߬ ߞߣߐ߫ ߞߏ߫: <<ߞߏߕߐ ߛߌߦߊߡߊ߲߫ ߛߎ߬ߡߊ߬ߣߎ߲ߜߊ߲ ߦߋ߫ ߜߊ߲ߜߘߊ ߟߎ߬ ߞߘߐ߫ ߡߎߣߎ߲߬߸ ߡߍ߲ ߓߘߊ߫ ߞߍ߫ ߕߙߎ߬ ߘߌ߫ ߞߊ߬ ߛߋ߲߬ߘߐ߬ߞߎ߬ߟߎ߲߬ ߕߌ߮ ߟߎ߬ ߣߌ߫ ߣߊ߲߬ߒ߬ߕߊ߲ ߠߎ߬ ߟߊߞߊ߲ߘߊ ߥߛߊ߬ߘߊ߬ߕߌ߮ ߟߎ߬ ߟߊ߫ ߡߊ߬ߛߐ߬ߘߐ߲߬ߠߌ߲ ߜߟߍ߬ߦߊ߬.>>

ߞߊ߬ߦߌ߯ ߕߙߊߓߊ ߕߟߋ߬ ߁߈ ߡߊ߬߸ ߌߛߌ߬ߙߊ߬ߌߟߊ߫ ߕߊ߬ߡߌ߲߬ ߘߊ߫ ߣߌ߫ ߞߎߘߊ߫ ߘߏ߲߬ ߠߴߊ߬ ߟߊ߫ ߞߍ߬ߟߍ ߘߐ߫߸ ߝߏ߫ ߥߊ߯ߕߌ ߏ߬ ߣߌ߫ ߛߌߛߍ߲߬ ߕߍ ߘߐ߫߸ ߞߟߍ߬ ߟߊ߬ߢߐߢߐ߲ ߠߎ߬ ߓߍ߯ ߓߘߊ߫ ߞߍ߫߸ ߓߊ߬ߙߌ߲߬ ߊ߬ߟߎ߬ ߓߘߊ߫ ߡߐ߰ ߄ ߁߁߇ ߝߊ߰ ߕߎ߬ߡߊ߬ߣߍ߲ ߏ߬ ߞߣߐ߫߸ ߞߊ߬ ߡߐ߰ ߁߂ ߀߁߃ ߖߐߞߌ߫، ߣߴߏ߬ ߕߍ߫߸ ߞߟߍ߬ ߟߊ߬ߢߐߢߐ߲ ߠߎ߬ ߞߍ߫ ߘߊ߫߸ ߝߏ߫ ߞߊ߬ ߥߛߎߟߊߘߋ߲߫ ߡߝߊߟߋ߲ ߠߎ߬ ߓߍ߯ ߞߍ߫.

߂߀߂߄ ߣߍߣߍߓߊ ߟߊ߫߸ ߞߌߢߍ߲߫ ߡߊ߲߬ߕߏ߲߬ߕߍ߬ ߞߕߌߖߌ߲ ߞߊ߬ ߡߌ߬ߘߊ߬ߟߌ߬ ߛߓߍ ߓߌ߬ߟߊ߬ ߌߛߌ߬ߙߊ߬ߌߟߊ߫ ߞߏߕߌ߯ ߝߟߐ ߓߍ߲ߖ߭ߊߡߍ߲ ߣߋߕߦߊߤߎ߫ ߞߐ߫߸ ߊ߬ ߣߌ߫ ߡߊ߬ߞߊ߲߬ߞߊ߲߬ߠߌ߲ ߞߏߕߌ߯ ߞߟߐ ߦߏߊߝ߭ ߜ߭ߊߟߊ߲߫߸ ߓߌ߬ߟߊ߬ ߞߍߣߴߊ߬ߟߎ߬ ߞߐ߫ ߞߍ߬ߟߍ ߞߎ߲߬ߞߏ߬ߓߊ߬ߕߐ߬ߦߊ ߟߋ߬ ߘߐ߫ ߜ߭ߊ߯ߖ߭ߊ߬ ߞߣߐ߫. ߏ߬ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߌߛߌ߬ߙߊ߬ߌߟߊ߫ ߖߍ߬ߘߍ ߝߣߊ߫ ߣߐ߬ߝߍ߬ߜߍ߲߬ߣߍ߲߫ ߕߋߟߋ߲ߓߊ߯ߦߊ ߡߊ߲߬ߕߏ߲߬ߕߍ߬ ߞߕߌߖߌ߲ ߓߟߏ߫߸ <<ߞߏߘߐߕߍ߮ ߘߌ߫ ߛߌߟߛߊߟߌ>> ߞߏߛߐ߲߬.

ߊߟߎ߫ ߞߏ߬ߣߌ߲ ߦߴߊ߬ ߟߐ߲߫ ߞߏ߫ ߊ߲ ߡߊ߫ ߞߎߡߊ ߢߌ߲߬ ߠߎ߬ ߝߐ߫ ߦߋ߲߬ ߕߋ߲߬߸ ߊ߬ ߓߟߏߡߌߘߊߞߟߊ ߦߋ߫ ߟߊ߬ߛߋ߬ߟߌ߬ ߛߓߍ߫ ߟߋ߬ ߘߌ߫߸ ߡߍ߲ ߝߘߊߣߍ߲߫ ߞߏߕߌ߯ߘߊ ߟߊ߫.

ߟߏ߲ߞߊߛߌߦߊ߫ ߞߡߊ߬ߙߊ߬

ߒߞߏ ߝߐ߰ߓߍ߬ߦߊ߬ߟߊ ߞߊ߲ߞߊ߲߫