ߓߌߟߏ߲ ߛߎ ߞߵߊ߬ ߘߎ߰ߛߊ ߜߍ߫ ߓߌ߬ ߛߌ߬ߣߌ߲߬ߟߏ߲ ߢߌ߲߬ ߠߊ߫߸ ߌߛߌ߬ߙߊ߬ߌߟߊ߫ ߞߊ߬ ߥߊ߬ߟߏ߲߬ߠߌ߲ ߠߎ߬ ߟߋ߬ ߛߌ߰ ߢߐ߲߮ ߞߊ߲߬ ߌߙߊ߲߫ ߞߊ߲ߡߊ߬߸ ߣߊ߲߬ߕߌ߮ ߟߎ߬ ߡߊߞߍ߫ ߘߌ߲ߞߌߙߊ ߟߎ߬ ߣߌ߫ ߞߟߍ߬ߡߎ߬ߙߊ߲߬ ߠߊ߬ߡߙߊ߬ ߘߌ߲ߞߌߙߊ ߟߎ߬ ߘߐ߫ ߌߙߊ߲߫ ߞߣߐ߫، ߌߛߌ߬ߙߊ߬ߌߟߊ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߣߐ߬ ߏ߬ ߟߊߥߟߌ߬ ߟߊ߫ ߖߘߍ߬ ߡߊ߬ߞߊߘߊ߲߲ ߠߋ߬ ߡߊ߬߸ ߞߵߊ߬ ߞߍ߫ ߞߏ ߘߏ߫ ߢߍߓߍ߲߬ߟߊ߲ ߘߌ߫، ߊ߬ߟߎ߬ ߟߊ߫ ߦߙߍߞߍߟߌ ߣߌ߲߬ ߓߘߊ߫ ߞߍ߫ ߕߙߎ߬ ߘߌ߫ ߞߊ߬ ߕߟߋ߬ߓߐ ߕߍߡߞߊߒߞߋ ߓߌ߬ߟߊ߫ ߞߣߐ߬ߜߊ ߘߐ߫߸ ߞߎߡߊߕߍ߫ ߘߎߢߊ߫ ߖߡߊ߬ߣߊ߬ ߛߌߦߊߡߊ߲߫ ߡߊ߬، ߌߙߊ߲߫ ߘߏ߲߬ ߝߣߊ߫ ߓߘߴߊ߬ ߞߊ߲߫ ߘߌ߫߸ ߞߏ߫ ߊ߬ ߓߍߣߵߊ߬ ߕߊߢߐ߲߯ߓߐ߫ ߟߋ߬ ߘߍ߯، ߏ߬ ߝߐ ߌߞߘߐ߫߸ ߌߛߌ߬ߙߊ߬ߌߟߊ߫ ߓߘߊ߫ ߡߊߕߊ߯ߡߓߊߟߌߦߊ ߛߌ߰ ߛߋ߲߬ߠߴߊ߬ߟߎ߬ ߟߊ߫ ߖߡߊ߬ߣߊ ߞߣߐ߫.
ߌߛߌ߬ߙߊ߬ߌߟߊ߫ ߡߊ߬ߞߊ߲߬ߞߊ߲߬ߠߌ߲ ߞߏߕߌ߮ ߌߖ߭ߙߊߍߟ ߞߊߕ߸ ߞߊ߲߫ ߞߏ߫ ߌߙߊ߲߫ ߝߣߊ߫ ߕߍ߬ߘߴߊ߬ ߝߍ߬ ߞߊ߬ ߞߎߟߎ߲ߞߎߟߎ߲߫ ߡߙߊߒߡߊߟߌ ߘߏ߫ ߟߋ߬ ߗߎ߲߫ ߊ߬ߟߎ߫ ߞߊ߲߬߸ ߊ߬ߟߎ߫ ߣߐ߬ ߣߌ߲߬ ߠߊߥߟߌ߬ ߟߊ߫ ߏ߬ ߟߋ ߞߏ ߢߍߓߍ߭ ߡߊ߬߸ ߛߴߊ߬ߟߎ߬ ߟߊ߫ ߖߡߊ߬ߣߊ ߘߌ߫ ߞߛߌ߫ ߏ߬ ߡߊ߬، ߊ߬ߟߎ߬ ߟߊ߫ ߟߊ߬ߛߋ߬ߟߌ߬ ߞߟߊߒߞߋ ߘߏ߫ ߘߐ߫߸ ߊ߬ ߝߐߣߴߊ߬ߟߎ߬ ߓߟߏ߫ ߏ߬ ߡߍ߲ ߞߣߐ߫ ߞߏ߫: <<ߡߙߊ߬ߒ߬ߡߊ߬ߟߌ ߘߏ߫ ߦߋ߫ ߛߋ߲߬ߠߊ߫ ߕߋ߲߭ߕߋ߲߭ ߣߌ߲߬ ߘߐ߫ ߌߛߌ߬ߙߊ߬ߌߟߊ߫ ߣߴߊ߬ ߖߡߊ߬ߣߊ߬ߘߋ߲߫ ߣߊ߲߬ߒ߬ߕߊ߲ ߠߎ߬ ߞߊ߲ߡߊ߬.>> ߏ߬ ߟߋ ߘߐ߫߸ ߞߏ߫ ߊ߬ߟߎ߬ ߟߊ߫ ߣߊ߲߬ߕߌ߮ ߟߎ߬ ߝߣߊ߫ ߓߘߴߊ߬ߟߎ߬ ߓߟߏߟߞߊߟߌߦߊ߫߸ <<ߞߊ߬ ߞߎ߲߬ߞߊ߲߬ ߝߟߐ ߕߋ߬>> ߡߍ߲ ߞߎ߲߬ߛߌ߲߬ߣߍ߲߫ <<ߣߊ߲߬ߕߌ߰ ߛߌߦߊߡߊ߲߫ ߠߊ߫߸ ߞߎߡߊߕߍ߫ ߊ߬ߟߎ߬ ߟߊ߫ ߦߙߐ߫ ߛߌߦߊߡߊ߲߫ ߡߊ߬߸ ߡߍ߲ ߠߎ߬ ߟߐ߬ߣߍ߲߫ ߌߙߊ߲߫ ߝߕߌ߫ ߢߍߥߟߊ ߟߎ߫ ߡߊ߬.>>
ߝߏߘߏ߲߫ ߡߊ߲ߞߊ߲ߓߊ߫ ߟߋ߬ ߓߐߣߍ߲߫ ߌߙߊ߲߫ ߞߎߓߋߘߊ ߟߊ߫ ߓߌ߬ ߕߤߋߙߊ߲߫߸ ߝߏ߫ ߊ߬ߟߎ߬ ߓߘߴߊ߬ߟߎ߬ ߟߊ߫ ߛߊ߲ߡߊߞߎߟߎ߲߫ ߠߎ߬ ߟߊ߫ ߜߊ߲ߠߌ߲߫ ߞߏ ߓߍ߯ ߟߊߟߐ߬ ߡߎߣߎ߲߬.
ߌߛߌ߬ߙߊ߬ߌߟߊ߫ ߞߊ߲߫ ߞߏ߫ ߊ߬ߟߎ߫ ߣߐ߬ ߌߙߊ߲߫ ߠߊ߫ ߞߟߍ߬ߦߊ߬ ߘߌ߲ߞߌߙߊ ߟߎ߫ ߟߋ߬ ߛߎߡߊ߲߫ ߠߊ߫ ߣߌ߲߬ ߞߏ ߘߐ߫ ߓߊߞߍ߭߸ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߊ߬ߟߎ߫ ߣߐ߬ ߦߙߍߞߍߟߌ ߡߍ߲ ߞߍ߫ ߟߊ߫߸ ߊ߬ ߞߏ ߞߍߣߍ߲߫ ߤߊ߲ߞߟߌ߫ ߟߋ߬ ߟߊ߫.
ߊߡߙߌߞߌ߬ ߞߊ߬ߝߏ߫ ߘߍ߬ߣߍ߲ ߞߟߊ߬ߕߌ߮ ߡߊߙߑߞߏ ߙߎߓߌߦߏ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߛߋ߲߬ ߕߍ߫ ߌߛߌ߬ߙߊ߬ߌߟߊ߫ ߟߊ߫ ߥߊ߬ߟߏ߲߬ߠߌ߲ ߢߌ߲߬ ߘߐ߫ ߡߎ߬ߡߍ߫، ߥߊ߲ߛ߭ߌ߲ߕߐ߲߫ ߞߊ߲߫ ߞߏ߫ ߌߛߌ߬ߙߊ߬ߌߟߊ߫ ߣߐ߬ ߊ߬ ߦߌ߬ߘߊ߬ ߟߴߊ߬ߟߎ߬ ߟߊ߫ ߟߋ߬߸ ߞߏ߫ ߝߏ߫ ߊ߬ߟߎ߫ ߕߍ߬ߘߍ߫ ߣߌ߲߬ ߞߍ߫ ߟߋ߬߸ ߞߵߊ߬ߟߎ߫ ߖߘߍ߬ ߡߞߊߘߊ߲߫، ߊߡߙߌߞߌ߬ ߞߊ߲ߕߌ߮ ߘߏߣߊߟ ߕߑߙߐ߲ߔ ߞߊ߲߫ ߞߏ߫ ߊ߬ߟߋ߫ ߞߵߊ߬ ߝߐ߫ ߟߋ߬ ߕߋ߬ߟߋ ߘߐ߫߸ ߞߏ߫ ߊ߬ߟߋ ߦߴߊ߬ ߝߍ߬ ߣߌ߲߬ ߞߏ ߦߋ߫ ߘߐߛߎߡߊ߫ ߖߌ߫ ߢߡߊߟߐ߬ߣߍ߲߫ ߠߋ߬ ߞߘߐ߫، ߝߣߊ߫߸ ߞߏ߫ ߊ߬ ߞߵߊ߬ ߝߐ߫ ߟߋ߬ ߌߛߌ߬ߙߊ߬ߌߟߊ߫ ߦߋ߫߸ ߞߏ߫ ߊ߬ ߞߊߣߊ߬ ߥߊ߬ߟߏ߲߬ߠߌ߲߬ ߛߌ߫ ߟߐ߬ ߌߙߊ߲߫ ߡߊ߬، ߓߊߏ߬߸ ߞߏ߫ ߌߙߊ߲߫ ߠߊ߫ ߝߕߌ߫ ߞߏ ߣߌ߲߬ ߘߌ߫ ߛߋ߫ ߘߐߛߎߡߊ߫ ߟߊ߫ ߕߍߓߊ߯ߦߊ ߟߋ߬ ߟߊ߫߸ ߝߊ߲߬ߞߊ ߕߍ߫ ߘߋ߬.
ߥߊ߬ߟߏ߲߬ߠߌ߲ ߣߌ߲߬ ߞߍ ߌߞߘߐ߫߸ ߊ߬ ߣߐ߭ ߓߘߊ߫ ߦߋ߫ ߞߏ ߓߍ߯ ߡߊ߬، ߓߊߏ߬߸ ߞߓߊߕߟߎ ߓߘߊ߫ ߦߍ߬ߟߍ߫ %߆ ߢߐ߲߰ ߠߊ߫߸ ߝߏ߫ ߤߊߡߌ߲߫ ߓߘߊ߫ ߞߍ߫ ߡߎߣߎ߲߬߸ ߞߏ߫ ߊ߬ ߞߏ ߡߊ߲߬ߕߙߐ ߞߊߣߊ߬ ߛߋ߫ ߘߎߢߊ߫ ߜߟߐߡߌ߲ ߞߏߢߊ ߟߎ߬ ߡߊ߬ ߟߐ߯ߝߍ ߟߎ߬ ߞߣߐ߫.
ߒߞߏ ߝߐ߰ߓߍ߬ߦߊ߬ߟߊ ߞߊ߲ߞߊ߲߫
