ߡߊ߬ߟߌ ߣߊ߲߬ߕߌ߰ ߝߊ߲ߞߊ ߓߘߴߊ߬ ߟߊߛߋ߫ ߞߏ߫ ߊ߬ߟߎ߫ ߣߐ߬ ߡߊ߲߬ߕߙߐ߫ ߟߋ߬ ߛߐ߬ߘߐ߲߬ ߠߴߊ߬ߟߎ߬ ߡߊߞߍ߫ ߦߌߟߊ ߘߐ߫ ߕߋߛߌߕ߸ ߞߵߏ߬ ߞߎ߲߭ ߞߍ߫ ߡߙߊ߬ߒ߬ߡߊ߬ߟߌ ߘߏ߫ ߘߌ߫ ߊ߲ߛߏ߲ߜ߭ߏ߫ ߡߊ߬ߙߊ ߘߐ߫߸ ߜߵߊ߬ߥߏ߫ ߕߌ߲߬ߞߎߘߎ߲ ߘߐ߫߸ ߖߡߊ߬ߣߊ ߞߐ߰ߘߎ߮ ߘߐ߫، ߊ߬ߟߎ߫ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߊ߬ߟߎ߬ ߓߘߊ߫ ߡߊ߬ߕߊ߰ߡߊ߬ߟߌ߫ ߛߌ߰ ߛߋ߲߬ߠߊ߫.
<<ߣߊ߲߬ߕߌ߰ ߘߊ߯ߘߐ ߦߋ߫ ߖߡߊ߬ߣߊ ߞߣߐ߫ ߡߐ߮ ߟߎ߬ ߟߊߟߐߠߌ߲߫ ߠߊ߫߸ ߞߵߊ߬ ߟߊߛߋ߫ ߘߎߢߊ߫ ߕߐ߭ ߓߍ߯ ߡߊ߬߸ ߞߏ߫ ߓߊ߰ߓߊ߰ߟߌ߬ ߞߙߎ߫ ߡߙߊ߬ߒ߬ߡߊ߬ߝߋ߲߬ߕߌ߮ ߟߎ߬ ߓߘߊ߫ ߡߙߊ߬ߒ߬ߡߊ߬ߟߌ߬ ߞߎߘߊ߫ ߞߍ߫߸ ߂߀߂߅ ߥߊ߬ߛߎ߬ߥߙߊ ߕߟߋ߬ ߀߄ ߢߌ߲߬ ߡߊ߬ ߁߅ߙߋ߲߸ ߕߋߛߌߕ ߡߊߞߍ߫ ߦߌߟߊ ߞߣߐ߫ ߜ߭ߊ߬ߥߏ߬.>> ߏ߬ ߟߊߛߋ߫ ߘߊ߫ ߣߊ߲߬ߕߌ߮ ߟߎ߬ ߟߊ߫ ߝߘߏߏ߬ߓߊ߬ ߓߌ߬ߟߊ߬ߢߐ߲߰ߡߊ ߞߌ߬ߓߊ߬ߙߏ߬ߘߊ ߗߋߕߌ߯ߘߊ ߟߋ߬ ߓߟߏ߫، ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߊ߫ ߛߊ߲ߡߊߖߊ߲ߓߊ߲ߠߌ߲߫ ߛߌ߰ ߛߋ߲߬ߠߊ߫߸ ߡߍ߲ ߘߌ߫ ߛߴߊ߬ ߖߊ߲߬ߕߏ߬ ߟߊ߫ ߘߌ߲߬ߞߌߙߊ ߟߎ߬ ߘߐ߫.
ߣߊ߲߬ߕߌ߮ ߢߌ߲߬ ߠߎ߫ ߞߏ߬ߣߌ߲ ߡߴߊ߬ ߝߐ߫߸ ߕߙߐߦߊ ߞߛߊ߬ߓߌ ߡߍ߲ ߞߵߊ߬ߟߎ߫ ߛߐ߬ߘߐ߲߬߸ ߥߟߊ߫ ߕߌߢߍߟߌ ߣߌ߫ ߞߊ߬ߛߙߊ ߡߍ߲ ߘߏ߲߬ߣߴߊ߬ߟߎ߫ ߞߎ߲߬، ߊߟߎ߫ ߞߏ߬ߣߌ߲ ߦߴߊ߬ ߟߐ߲߫ ߞߏ߫ ߊ߬ ߞߍߣߍ߲߫ ߝߊ߲߭ ߡߍ߲ ߠߎ߬ ߘߐ߫ ߣߌ߲߬߸ ߓߊ߰ߓߊ߰ߟߌ߬ߟߊ ߟߎ߬ ߟߊ߫ ߡߙߊ߬ߒ߬ߡߊ߬ߟߌ ߞߊ߫ ߛߌߦߊ߫ ߓߊߟߋ߬ ߦߋ߲߬ ߠߎ߬ ߘߐ߫، ߓߊߏ߬߸ ߞߎ߲߬ߢߐ߲߰ ߞߋߟߋ߲ ߞߣߐ߫ ߕߋ߲߬ ߝߊߦߌߘߊ߫߸ ߊ߬ߟߎ߬ ߟߊ߫ ߡߙߊ߬ߒ߬ߡߊ߬ߟߌ ߣߊ߯ߣߌ߲ߣߊ߲ ߠߵߏ߬ ߘߌ߫.
ߞߊ߬ߕߎ߲߯߸ ߘߓߊ߬ߕߊ ߕߟߋ߬ ߃߀ ߡߍ߲ ߕߊ߬ߡߌ߲߬ߣߍ߲߫ ߣߌ߲߬߸ ߡߙߊ߬ߒ߬ߡߊ߬ߟߌ߫ ߝߌ߬ߟߊ߬ߣߍ߲ ߞߍ߫ ߘߊ߫ ߕߣߊߓߜ߭ߎ߫߸ ߊ߬ ߣߌ߫ ߛߌߙߊߞߙߐߟߊ߫߸ ߞߎ߬ߟߌ߬ߞߙߐ߫ ߕߌ߲߬ߞߎߘߎ߲ ߘߐ߫ ߖߡߊ߬ߣߊ ߥߙߏ߬ߘߎ߮ ߘߐ߫، ߣߊ߲߬ߕߌ߮ ߟߎ߫ ߞߏ߬ߣߌ߲ ߛߋ߫ ߘߴߊ߬ߟߋ߬ ߓߊ߰ߓߊ߰ߟߌ߬ߟߊ ߟߎ߫ ߕߎߎ߲߬ߕߎ߲߬ ߠߊ߫ ߦߋ߲߬ ߘߐ߫.
ߤߊߟߌ߬ ߞߊߙߏ ߣߌ߲߬ ߕߟߋ߬ ߁߭ ߡߊ߬߸ ߓߎߟߑߞߋߛߌ߫ ߘߊ߮ ߝߣߊ߫ ߞߊ߬ ߕߙߐߦߊ߫ ߞߎߘߊ߫ ߡߐ߬ߛߐ߬ߘߐ߲߫ ߞߊ߬ ߝߘߊ߫ ߓߊ߰ߓߊ߰ߟߌ߬ߟߊ ߟߎ߬ ߟߊ߫߸ ߛߌ߬ߟߊ߬ߡߊ ߟߎ߬ ߣߌ߫ ߛߌ߬ߟߡߊ߬ߦߊ߫ ߞߐߡߊߓߌ߲ߓߌ߲߫ ߞߙߎ ߟߋ߬ ߞߵߊ߬ ߦߌ߬ߘߊ߫ ߏ߬ ߞߏ ߘߐ߫ ߞߏ߫ ߊ߬ߟߎ߫ ߣߐ߭ ߟߋ߬، ߏ߬ ߟߎ߬ ߡߍ߲ ߠߎ߬ ߟߊ߫ ߞߙߎ ߦߋ߫ ߊߟߑߞߊߦߌߘߊ ߓߏߟߏ߲ ߘߏ߫ ߘߌ߫߸ ߣߴߊ߬ ߢߍߦߊ ߦߋ߫ ߌ߬ߦߊߘ ߊߖ߭ ߜ߭ߊߟߌ߫ ߓߟߏ߫.
ߡߊ߬ߟߌ ߣߊ߲߬ߕߌ߰ ߘߊ߯ߘߐ ߞߊ߬ ߟߊ߬ߛߋ߬ߟߌ ߡߍ߲ ߞߍ߫ ߡߊ߬ߟߌ ߣߊ߲߬ߕߌ߯ (ߝߊ߰ߡߊ) ߟߎ߬ ߕߐ߯ ߘߐ߫߸ ߏ߬ ߞߵߊ߬ ߦߌ߬ߘߊ߫ ߟߋ߬ ߞߏ߫ ߣߊ߲߬ߕߌ߮ ߟߎ߬ ߝߣߊ߫ ߛߋ߫ ߘߊ߫ ߡߙߊ߬ߒ߬ߡߊ߬ߟߌ ߣߌ߲߬ ߠߊߕߎ߲߬ߕߎ߲߬ ߠߊ߫ ߟߋ߬ ߝߋߎ߫߸ ߞߵߊ߬ߟߎ߬ ߜߍ߲߫ ߞߘߎߞߘߎ߫.
<<ߗߍ߬ߘߋ߲ ߛߌߦߊߡߊ߲߫ ߠߋ߬ ߞߊ߬ ߘߏ߫ ߞߍ߫߸ ߝߏ߫ ߞߊ߬ ߛߴߊ߬ߟߎ߬ ߛߋߞߏ ߘߊ߲߭ ߠߊ߫߸ ߞߵߊ߬ߟߎ߫ ߝߊ߬ߛߏ ߡߊߞߊ߲ߞߊ߲߫߸ ߣߊߟߌ߬ߡߎ߲߫ ߡߊ߬ߟߌ ߘߎ߰ߞߟߏ ߘߌ߫.>> ߊ߬ߟߎ߫ ߞߏ߬ߣߌ߲ ߠߊ߫ ߟߊ߬ߛߋ߬ߟߌ ߣߌ߲߬ ߡߴߊ߬ ߦߌ߬ߘߊ߬߸ ߓߊ߰ߓߊ߰ߟߌ߬ߟߊ ߦߙߌߞߊ ߡߍ߲ ߝߊ߰ߣߍ߲߫߸ ߥߟߊ߫ ߣߊ߲߬ߕߌ߮ ߦߙߌߞߊ ߡߍ߲ ߠߎ߬ ߝߣߊ߫ ߝߊ߰ߣߍ߲߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫
ߒߞߏ ߝߐ߰ߓߍ߬ߦߊ߬ߟߊ ߞߊ߲ߞߊ߲߫
