ߛߣߍ߬ߜ߭ߊߟߌ߫: ߛߘߋߦߊߥߏ ߞߎ߲߬ߕߌ߰ߦߊ ߛߎߡߊ ߓߘߊ߫ ߘߎ߲߬ߘߎ߫ ߓߊ߬ߛߌߙߎ߬ ߖߏ߬ߡߊߦߌ߬ ߝߊߦߌ߬ ߝߍ߬

ߝߘߊ߬ߝߌ߲߬ߠߊ߫ ߕߟߋ߬ߓߋ߬ ߞߊߝߏ ߟߎ߬ ߟߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߘߍ߬ߓߊ (ߝ.ߕ.ߞ.ߡ.ߘ = ߛߘߋߦߊߥߏ) ߞߎ߲߬ߠߊ߬ߛߌ߰ߟߌ ߞߐߜߍ ߦߟߍ߬ߡߊ߲߬ ߕߎߡߊ ߓߘߊ߫ ߛߋ߫߸ ߞߊ߬ ߞߎ߲߬ߕߌ߰ ߞߎߘߊ߫ ߟߊߛߌ߰ ߊ߬ ߞߎ߲߬ߠߊ߫، ߒ߬ߓߊ߬߸ ߊ߬ߟߎ߬ ߟߊ߫ ߘߋ߬ߙߌ߬ߣߊ߲߬ ߟߊߘߍ ߆߇߲ ߡߍ߲ ߦߋ߫ ߛߋ߲߬ߠߊ߫ ߊߓߎߖߊ߫ ߕߋ߲߬߸ ߏ߬ ߡߍ߲ ߘߊߡߌ߬ߣߊ߬ߣߍ߲߫ ߓߌ߬ ߞߊ߯ߙߌ ߣߌ߲߬ ߡߊ߬ ߂߀߂߅ ߥߊ߬ߛߌ߬ߥߙߊ ߕߋ߬ߟߋ߫ ߂߂߸ ߖߋ߬ߟߌ߬ߓߊ߬ߟߊ߫ ߞߊ߲ߕߌ߮ ߊߤߑߡߍߘ ߓߏ߬ߟߊ ߕߌ߬ߣߓߎ߬ ߓߍߣߊ߬ ߥߊ߰ߣߍ߲ ߠߊߕߊ߬ߡߌ߲߫ ߡߐ߰ ߜߘߍ߫ ߡߊ߬ ߛߌ߲߬ߝߏ߲߬ߘߊ ߞߣߐ߫، ߒ߬ߓߊ߬߸ ߛߌߞߊ߫ ߞߍߣߍ߲ ߡߍ߲ ߠߎ߬ ߡߊ߬ ߏ߬ ߞߏ ߘߐ߫߸ ߣߌ߫ ߞߎ߲߬ߕߌ߰ߦߊ ߛߎ߬ߘߎ߲߬ߡߊ߫ ߊ߬ߟߎ߬ ߟߊ߫߸ ߛߣߍ߬ߜ߭ߊ߬ߟߌ߬ ߞߊ߲ߕߌ߮ ߓߊ߬ߛߌߙߎ߬ ߖߏ߬ߡߊߦߌ߬ ߝߊߦߌ߬ ߟߋ߬ ߛߎߥߊ߲ߘߌߣߍ߲߫ ߏ߬ ߞߏ ߘߐ߫ ߡߎߣߎ߲߬.

ߞߊ߬ߝߏ߬ ߞߎ߲ߕߌ߮ ߟߎ߬ ߟߊ߫ ߜߊ߬ߙߊ ߣߌ߲߬ ߡߊߛߎ߬ߘߎ߲߬ߧߊ߬ߓߊ߰ ߜߐߞߎ ߘߏ߫ ߟߎ߫ ߟߊ߫ ߝߐߟߌ߫ ߘߐ߫߸ ߞߏ߫ ߛߣߍ߬ߜ߭ߊ߬ߟߌ߬ ߞߊ߲ߕߌ߮ ߛߎߥߊ߲ߘߌ߫ ߞߏ ߝߐ߫ ߘߴߊ߬ߟߎ߬ ߟߊ߫ ߢߐ߲߯ߦߋ ߘߏ߫ ߟߋ߬ ߛߋ߲߭ߝߍ߬ ߛߌ߬ߣߌ߲߬ߟߏ߲ ߥߊ߬ߛߌ߬ߥߙߊ ߕߋ߬ߟߋ߫ ߂߀ ߡߊ߬، ߊ߬ ߘߏ߲߬ ߓߏ߬ߟߊ ߕߌ߬ߣߓߎ߬ ߟߊ߫ ߟߐ߬ߒ߬ߞߋ߬ߟߊ ߓߘߊ߫ ߛߴߊ߬ ߞߎ߲߬ߘߏ߲ ߠߋ߬ ߡߊ߬ ߕߋ߲߬ ߝߊߦߌߘߊ߫.

ߛߘߋߦߊߥߏ ߞߎ߲߬ߕߌ߰ߦߊ ߘߌ ߛߣߍ߬ߜ߭ߊ߬ߟߌ߬ ߞߊ߲ߕߌ߯ ߘߋ߲ߡߌߛߍ߲ ߣߌ߲߬ ߡߊ߬߸ ߓߊ߬ߛߌߙߎ߬ ߖߏ߬ߡߊߦߌ߬ ߝߊߦߌ߬߸ ߏ߬ ߕߊ߬ߣߴߊ߬ ߟߊ߫ ߘߊߘߐߖߊߥߏ߫ ߕߣߐ߬ߡߊ ߟߎ߫ߟ ߋ߬ ߝߍ߬ ߛߘߋߦߊߥߏ ߣߌ߫ ߞߌ߬ߢߍ߬ߞߏ߲߬ߞߏ߬ ߞߊߝߏ ߟߎ߬ ߟߊ߫ ߢߌ߲߬ߘߍ ߛߌ߲߬ߝߏ߲߬ ߖߡߊߣߊ ߟߎ߬ ߕߍ߫߸ ߏ߬ ߟߎ߬ ߡߍ߲ ߠߎ߬ ߓߐ߫ ߛߊ߲ ߦߋ߫ ߛߘߋߦߊߥߏ ߘߐ߫ ߕߋ߲߬ ߞߊ߬ߣߌ߲߬، ߞߊ߬ߦߌ߯ ߊ߬ ߛߎߥߊ߲ߘߌ߫ ߘߊ߫ ߞߵߊ߬ ߟߊߛߌ߰ ߛߣߍ߬ߜ߭ߊߟߌ߫ ߞߎ߲߬ߠߊ߫߸ ߛߟߊߕߌ߯ ߝߊߦߌ߬ ߥߊ߬ߣߌ߲߬ߞߋ ߕߍ߫ ߘߏ߫ ߜߘߍ߫ ߘߌ߫ ߝߘߊ߬ߝߌ߲߬ߠߊ߬ ߞߣߐ߫ ߞߏ ߟߎ߬ ߘߐߛߎߡߊ ߞߐ߫߸ ߖߛߎ߬ߛߎߡߊ ߟߊߘߏ߲߭ ߞߍ߫ ߕߟߋ߬ߓߋ߬ ߊߝߙߌߞߌ߬ ߞߣߐ߫ ߦߊ߲߬.

ߣߴߊ߬ߟߋ ߟߊߛߌ߰ ߞߏ ߕߏ߫ ߘߴߊ߬ ߡߊ߬߸ ߊ߬ߟߋ ߟߋ߬ ߞߍߕߐ߫ ߛߘߋߦߊߥߏ ߞߊ߲ߕߌ߯ ߃߇߲ ߘߌ߫߸ ߊ߬ ߛߌ߲ߘߌ ߣߌ߫ ߓߌ߬ ߕߍ߫߸ ߊ߲ ߧߴߏ߬ ߡߍ߲ ߛߊ߲߬ ߄߉ ߘߐ߫ ߕߋ߲߬ ߞߊ߬ߣߌ߲߬، ߞߎ߲߬ߕߊ߮ ߏ߬ ߡߍ߲ ߞߣߐ߫߸ ߞߏ߫ ߛߌߦߊߡߊ߲߫ ߓߘߊ߫ ߕߊ߬ߡߌ߲߬߸ ߝߏ߫ ߊ߬ߟߎ߬ ߟߊ߫ ߛߌ߲߬ߝߏ߲ ߠߎ߬ ߓߘߊ߫ ߘߐ߯ߦߊ߫ ߞߊ߬ ߖߌ߰ ߕߊ߲ ߣߌ߫ ߝߌ߬ߟߊ߬ ߘߐ߫، ߓߊߏ߬߸ ߡߊ߬ߟߌ߸ ߓߙߎߞߌߣߊ߫ ߝߊ߬ߛߏ߬߸ ߖߋ߬ߟߌ߬ߓߊ߬ߘߎ߯߸ ߏ߬ ߟߎ߬ ߓߘߴߊ߬ߟߎ߫ ߛߋ߲߬ߓߐ߫ ߊ߬ ߘߐ߫.

ߓߊ߬ߛߌߙߎ߬ ߖߏ߬ߡߊߦߌ߬ ߝߊߦߌ߬ ߟߊ߫ ߗߋߦߊߟߌ ߞߍߕߐ߫ ߡߍ߲ ߘߌ߫߸ ߏ߬ ߘߌߣߊ߬ ߜߟߍ߬ߦߊ߬ ߞߏߛߓߍ߫، ߓߊߏ߬߸ ߝߏ߫ ߊ߬ ߦߴߊ߬ ߟߊ߫ ߕߍߝߐ ߟߋ߬ ߝߊ߲߬ߞߊߘߏ߲߬߸ ߞߊ߬ ߞߏߟߊߘߍߢߐ߲߯ߦߊ ߞߐߞߘߐߘߏ߲߬ ߛߘߋߦߊߥߏ ߞߣߐ߫߸ ߞߵߏ߬ ߞߎ߲߭ ߞߍ߫ ߜߟߍ߬ߦߊ߬ ߛߌߦߊߡߊ߲߫ ߘߏ߲߭ ߘߌ߫߸ ߟߊ߬ߞߊ߲߬ߘߊ߬ߟߌ ߡߊ߬ߘߎ߮ ߘߐ߫߸ ߛߐ߬ߘߐ߲ ߡߊ߬ߘߎ߮ ߘߐ߫߸ ߊ߬ ߣߌ߫ ߤߊߟߌ߬ ߓߘߍ߬ߓߘߍ߬ߟߌ ߡߊ߬ߘߎ߮ ߘߐ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫

ߒߞߏ ߝߐ߰ߓߍ߬ߦߊ߬ߟߊ ߞߊ߲ߞߊ߲߫